Aldís Hafsteinsdóttir

Fórum í vetrarfríinu til Amsterdam með strákana. Höfðum leigt húsbát fyrir dvölina sem var meiriháttar sniðugt. Hann var staðsettur rétt við dýragarðinn og í auðveldu strætósambandi við miðborgina. Þetta var heilmikil lífsreynsla og gaman að prufa að búa um borð í bát. Þetta var annars 60 tonna fljótabátur sem byggður var 1920 svo hann var með mikla sál en eigandinn hafði innréttað hann allan sem eina íbúð.
Þetta var reyndar í síðasta sinn sem báturinn var leigður því ný reglugerð gerir að verkum að nú má ekki leigja út húsbáta í Amsterdam nema eigandinn búi sjálfur í bátnum að hluta til.
EN Amsterdam var frábær. Við brugðum ekki útaf venjunni og náðum að skoða mjög mikið. Heimsóttum Önnu Frank safnið sem var mikil upplifun. Það er ótrúlega magnað að ganga um húsið hennar og sjá með eigin augum þær aðstæður sem fjölskyldan bjó við.
Van Gogh safnið svíkur engan en karlpeningnum fannst nú ekki mikið til koma. Dýragarðurinn og Madame Tussaud voru vinsælli og ekki síður Ajax leikvangurinn en "Dýflissu" safnið var víst toppurinn. Skoðuðum líka "Our lord in the attic" sem er eitt frægasta safnið í borginni og er eindregið hægt að mæla með því. Urðum síðan að sjálfsögðu að skoða hið fræga "rauða hverfi", yngsta fjölskyldumeðlimnum fannst við skelfilegir foreldrar að leiða hann um þetta hverfi! ! Enda lifnaðurinn þarna ekki til fyrirmyndar. En borgin er falleg og mannlífið eftirminnilegt svo þetta var hin besta helgi.