Aldís Hafsteinsdóttir

Sjálfstæðisfundur, ráðstefnur og píanó ...

Aðalfundur Sjálfstæðisfélagsins var haldinn í gærkvöldi. Gísli Páll Pálsson endurkjörinn formaður félagsins ásamt hans ágætu stjórn. Nýr í stjórn er Birkir Sveinsson sem kemur í stað Þrastar Helgasonar sem er að flytja til höfuðborgarinnar.
Stjórnin er öflug og starfsöm og skilar af sér góðum rekstri. Bullandi hagnaður af rekstri félagsins kosningaárið en það þykir afrek í sjálfu sér.
Góður fundur, mikið spurt og spjallað um bæjarmálefnin eins og gefur að skilja enda mörg mál í gangi og önnur í farvatninu.
----------------------
Er að vinna í tveimur erindum sem ég hef tekið að mér að halda á næstunni. Annað á sveitarstjórnarráðstefnu Orkuveitu Reykjavíkur og hitt á fjármálaráðstefnu sveitarfélaganna. Þetta er heldur meiri vinna en ég gerði mér grein fyrir og sérstaklega er tímaskortur að stríða mér við þetta en framundan er löng helgi með fjölskyldunni og ég ætla helst ekki að grípa tölvuna með á þær slóðir.
----------------------
Heimsótti Grunnskólann í gærmorgun en þar afhentum ég, fyrir hönd bæjarstjórnar, og Robert Darling skólastjóri Tónlistarskóla Árnessýslu skólanum forláta píanó í tilefni af 60 ára afmæli hans.
Tvær ungar stúlkur spiluðu á nýja hljóðfærið, þær Dagný Lísa frænka mín og Jóhanna Eir Björnsdóttir. Báðar afskaplega flinkar. Afmælinu var fagnað með eftirminnilegum hætti nýverið þegar allir nemendur og starfsmenn fóru í skrúðgöngu um bæinn eftir að hafa myndað töluna 60 á skólalóðinni. Mynd af því kom m.a. á forsíðu á Dagskránni.
Veisluhöldin standa síðan út árið með einum eða öðrum hætti.
---------------------
Er að velta fyrir mér hvort það séu engin takmörk fyrir því hversu mikið getur rignt ! ! Eftir flóðið mikla í Varmá um daginn þá finnst mér þetta verðugt rannsóknarefni en það er með ólíkindum hversu vatnsmikil sú sakleysislega á getur orðið. Bærinn ætti að setja upp vefmyndavél sem sýnir fossinn! Ég er viss um að margir yrðu fljótt háðir því að fylgjast með þróun mála þar.