Aldís Hafsteinsdóttir

Útskrift úr ME, pennavinir og tónlistarhátíð ...

Það telst til viðburða þegar ég set færslur á síðuna enda byrja þær flestar orðið á sama veg. Reyni reyndar að hemja gleði mína yfir dugnaðnum til að allar færslur byrji ekki á "nú er langt síðan ég skrifaði síðast....". Fer að minna mig á þegar ég átti 14 pennavini á unga aldri. Þá byrjuðu flest bréfin á "afsakaðu hvað ég svara seint en ..."

Já, ég var pennavinaóð á tímabili. Átti fullt af pennavinum hér á landi og heilan helling út um allan heim, í Ástralíu, Þýsklandi, Ghana, Dominicanska lýðveldinu, USA og já ekki má gleyma Samuel Baum í Ísrael. Hann var ofur duglegur frímerkjasafnari og dældi ég til frímerkjum til Ísrael á tímabili. Eignaðist auðvitað helling af frímerkjum sjálf sem ég endaði með að selja Valda bróður og keypti mér segulband fyrir andvirðið. Þótti það góður díll... Í dag fæ ég aldrei handskrifuð bréf, fæ ekki einu sinni tölvupósta sem líkjast bréfum. Nei nú les ég blogg eins og þjóðin öll og minningar fyrir sagnfræðinga framtíðarinnar verða sennilega varla til. Við verðum að öllum líkindum "gleymda kynslóðin". Sú sem skrifar mest en geymir minnst. Spáið í það.

Nú er undirbúningur fyrir Tónlistarhátíðina Bjartar Sumarnætur í fullum gangi. Flott dagskrá og frábærir flytjendur. Guðrún Jóhanna og Víkingur Heiðar eru stjörnur á hinu klassíska sviði og það verður stórkostlegt að upplifa þessa snillinga ásamt félögum í Hveragerðiskirkju aðra helgina í júní.

Gömlu góðu Hveragerðislögin munu ganga í endurnýjun lífdaga á hátíðinni því Atli Heimir Sveinsson vinnur nú að endurútsetningu þeirra svo það verður spennandi að heyra afraksturinn sunnudaginn 10. júní. Munið... taka helgina frá ....

En ég rakst á þetta á Moggavefnum áðan. Guðrún Jóhanna söngkona að fá enn eina viðurkenninguna. Ætlaði síðan að finna lagið Ljósbrá á netinu þar sem það er eitt frægasta Hveragerðislagið, gull fallegur tangó eftir Eirík Bjarnason. Fann það auðvitað í óteljandi útgáfum en fann um leið þessa skemmtilegu bloggsíðu sem ég reyndar veit ekki hver skrifar en þarna má, inná milli, lesa ýmislegt skemmtilegt frá árdögum byggðar í Hveragerði. Lesturinn minnti mig á sunnudagsmorgnana þegar pabbi skutlaði okkur systkinunum í sunnudagaskólann og fór síðan niður á hótel að ræða pólitík við Eirík blinda. Þegar sunnudagaskólanum lauk töltum við á spariskónum niður brekkuna til pabba. Oftar en ekki voru þeir langt í frá búnir að ræða málin og þá var gaukað að okkur appelsínulímonaði til að við værum til friðs þar til málin voru fullrædd.
-------------------
Annars fór stórfjölskyldan austur á land um síðustu helgi til að útskrifa dótturina úr ME. Yndisleg helgi í alla staði. Laufey stóð sig vel og útskrifaðist sem stúdent með glæsibrag. Við vorum öll alveg ótrúlega stolt af stelpunni.
Það er gaman að sjá hvernig hver skóli hefur sín sérkenni. Hvort sem það er MA, FSu, ME eða FSS þá er gleðin alltaf sú sama. Þetta er stór stund fyrir stúdentinn og ekki síst fyrir fjölskylduna.
-------------------
Ákvað að minnast ekki á hina nýju ríkisstjórn eða niðurstöðu kosninga. Nógir um það.
Læt nægja að segja að Geir er og verður traustur leiðtogi og ríkisstjórnin mun án vafa standa undir væntingum.