Aldís Hafsteinsdóttir

Af beitarréttindum og bæjarstjórum...

Herdís Þórðardóttir birtir í síðustu Dagskrá enn eina greinina þar sem hún venju samkvæmt eys úr skálum reiði sinnar yfir meirihluta Sjálfstæðismanna.

Ég gleymdi reyndar að lesa greinina og mundi ekki eftir henni fyrr en í 75 ára afmælinu hans Sigfúsar frænda á sunnudag þar sem Guðmundur föðurbróðir minn fór mikinn yfir umræddri grein. Þá skyndilega fannst mér ég þurfa að skýra eitt atriði betur:

Nú þegar skipulag Eyktarsvæðisins er á lokastigi var brýnt að leysa þau mál sem óleyst voru á svæðinu en beitarréttindi ábúandans á Krossi voru eitt þeirra. Samningaviðræður milli lögmanna Hveragerðisbæjar og ábúanda báru ekki árangur eins og bæjarfulltrúar sáu í útsendum gögnum. Boði um greiðslu bóta að upphæð rétt rúmlega 6 mkr. var hafnað og frekari samningaumleitanir báru ekki árangur. Því var ekki önnur leið fær en að leita til óvilhallra aðila um að meta þau réttindi sem þarna er um að ræða. Lögmenn bæjarfélagsins fólu matsnefnd eignarnámsbóta að meta umrædd réttindi. Í úrskurði matsnefndar kemur fram að beitarréttindin að Krossi eru metin á 13,5 milljónir króna. Líkt og venja er fellur kostnaður málsaðila á matsbeiðanda.

Með úrskurðinum er ljóst að beitarréttindi ábúandans á Krossi á hinu svonefnda Eyktarlandi eru mun meira virði heldur en fyrri meirihluti sem gerði samning um sölu á landinu gerðu sér grein fyrir. Með ákvæðinu í Eyktarsamningnum um að bæta beri ábúandanum réttindin myndast skýlaus bótakrafa sem óhjákvæmilegt er að taka tillit til.
Ný þegar lyktir máls eru ljósar má með nokkurri vissu fullyrða að betra hefði verið að ganga frá þessum samningi áður en landið var selt þriðja aðila. Niðurstaðan stendur þó óhögguð og hún er sú að fyrri meirihluti mat beitarréttindin sem óveruleg, niðurstaðan reynist allt önnur.

Öll þessi umræða fór reyndar fram á fundum bæjarráðs og bæjarstjórnar og hvet ég áhugasama til að fylgjast með umræðunum á www.hveragerdi.is
----------------------------------------
Bæjarstjórar víðs vegar að af landinu hittust í Álftaneshreppi hinum forna um liðna helgi. Bæjarstjórar Álftaness, Garðabæjar og Hafnarfjarðar höfðu veg og vanda af skipulagningunni og var enginn svikinn af dagskránni. Það er ótrúlegt að sjá uppbygginguna sem er í þessum sveitarfélögum og að heyra um framtíðaráform sveitarstjórnarmanna þar. Að ári verður síðan hist í Húnaþingi Vestra Þar eru aðrar áherslur sem gaman verður að fræðast um.
----------------------------------------