Aldís Hafsteinsdóttir

Undirbjó í dag ...

... bæjarráðsfund sem verður í fyrramálið. Mörg mál á dagskrá en þrátt fyrir það hef ég ekki trú á því að fundurinn verði mjög langur.

Síðdegis hittist hér á bæjarskrifstofunni hópur sem allur hefur áhuga og hagsmuni á Reykjum. Fulltrúar frá fyrirtækjum og stofnunum settist niður til skrafs og ráðagerða um þá framtíðarmöguleika sem staðurinn býður uppá. Það verður gaman að fylgja þessu eftir enda möguleikarnir margir.

Fundaði fyrir hádegi með aðilum sem hyggja á mikla uppbyggingu undir Hamrinum. Það fer að líða að því að deiliskipulag af því svæði líti dagsins ljós.

Það koma margir í heimsókn og málefnin eru margvísleg. Eitt af því skemmtilega við þetta starf er að vita aldrei fyrirfram hvernig dagurinn verður.

Eldhúsdagsumræður á Alþingi í kvöld. Viðbrögð Alberts við umræðunum minntu mig á gamla daga þegar þetta var leiðinlegasta sjónvarpsefni sem ég vissi. Nú er öldin önnur og ég horfi á með áhuga. Athyglisvert að fylgjst með stjórnarandstöðunni sem reynir nú í örvæntingu að koma því inn hjá landanum að hér sé allt á vonarvöl. Hef ekki trú á því að margir falli fyrir þeim áróðri. Ríkisstjórnin hefur gert það að verkum að hér er velsæld sem aldrei fyrr, auðvitað er enginn hafinn yfir gagnrýni, en ég hef ekki trú á því að þjóðin taki þá áhættu sem felst í vinstri stjórn. Stjórn sem yrði sambræðingur þriggja flokka sem sameinast um fátt annað en eigið valdabrölt.

Meistaraflokkur kvenna í körfu spilaði mikilvægan leik í kvöld við Breiðablik þar sem úr því fékkst skorið hvort liðið félli niður í 2. deild. Hamarsstelpurnar gerðu sér lítið fyrir og unnu og spila því áfram í efstu deild. Vel gert !

Síðdegis á morgun verður lagt af stað í stelpuferð til Baltimore. Verður spennandi að koma til Bandaríkjanna í fyrsta sinn. Ætla að kíkja á Hvíta húsið og athuga hvort Bush sjáist bregða fyrir !