Aldís Hafsteinsdóttir

Af afrekum helgarinnar ...

Á föstudagskvöldinu skruppum við Lárus á Selfoss en þar var Prentmet Suðurlandi með móttöku í tilefni af eigendaskiptum og afmælum prentsmiðjanna tveggja sem nú hafa sameinast. Vorum lengur en til stóð því þarna var fjöldi fólks sem gaman var að spjalla við. Allt útlit er fyrir að Prentsmiðja Suðurlands muni dafna vel með nýjum eigendum og nýju nafni.

Á laugardagsmorgninum fór ég í bæinn til að vera þátttandandi í vikulokaþættinum á Rás1. Við vorum þrjú í viðtalinu, ég, Árni Þór Sigurðsson. borgarfulltrúi og Katrín Theódórsdóttir,lögmaður. Fínn hópur svo það var ekki vandamál að finna umræðuefni. Frekar að tíminn væri of stuttur, en það er algeng upplifun í svona þáttum. Missti af opnu húsi Sjálfstæðismanna í staðinn, skilst að fjölmargir hafi mætt en opnu húsin hafa fyrir löngu sannað gildi sitt. Verst að það á eftir að vera mér erfitt að mæta næstu laugardaga. Um komandi helgi er árshátíð Kjörís haldin í Freysnesi og helgina þar á eftir erum við stelpurnar úr saumaklúbbnum í Baltimore. Við skiptumst reyndar á að mæta bæjarfulltrúarnir svo aðrir standa vaktina þó einhverja vanti.

Árshátíð starfsmanna Hveragerðisbæjar var haldin á Hótel Örk á laugardagskvöldið og tókst vel. Metþáttaka og mikil stemning.

Fór á Ronju ræningjadóttur með strákana í dag, sunnudag. Albert var búinn að fara áður en það var ekki seinna vænna fyrir mig að fara og að sjá Guðbjörgu litlu í hlutverki grádvergs. Hún var óþekkjanleg í búningnum en við vorum búnar að koma okkur saman um merki til að við myndum þekkja hana svo það fór ekki á milli mála hvaða grádvergur tilheyrði fjölskyldunni. Pála bauð okkur að skoða sviðsmyndina eftir sýningu en það er heilmikil upplifun að sjá hvernig sviðið lítur út hinu megin frá.

Þar sem færslan í dag verður um félagslífið frekar en pólitík þá er rétt að bæta við að á miðvikudagskvöldið í síðustu viku fór fjölskyldan á Jesus Christ Superstar sem Leikfélag Hveragerðis frumsýndi um síðustu helgi. Sýningin á miðvikudag var sérstök afmælissýning en þá fagnaði félagið 60 ára afmæli. Hefur það sett upp sýningar að ég held árlega allan þennan tíma. Geri aðrir betur ...
En uppfærslan á Jesus Christ Superstar er mjög skemmtileg og það er með ólíkindum hvernig leikfélaginu tekst sífellt að koma manni á óvart með frumlegum sviðsmyndum í þessu litla leikhúsi. Hvet alla til að mæta í Völund og sjá frábæra sýningu.