Aldís Hafsteinsdóttir

5 daga ferð til Brussel að baki. Nato helsti viðkomustaðurinn. Heimsóttum einnig sendiráð Íslands og nýja skrifstofu Sambands íslenskra sveitarfélaga.
Eftir þessa daga ættum við að vera fær í flestan sjó í umræðum varðandi Schengen, EES, EB, ESB, Shape, Efta og fleiri góðar stofnanir. Ef minni mitt væri betra þá hefði ég líka lært ótölulegan fjölda skemmtisagna af Skagfirðingum og Norðmönnum sem ferðafélagarnir gerðu ódauðlega í ferðinni.

Ég og Pétur, íþrótta- og tómstundafulltrúi, heimsóttum grunskólann í morgun og afhentum öllum nemendum í 1.-3. bekk sundtöskur til að hvetja þau til að stunda sund og aðrar íþróttir. Það er alltaf gaman að heimsækja grunnskólann enda var okkur afskaplega vel tekið. Við örstutta athöfn afhentum við líka viðurkenningar til þeirra sem farið hafa 30 sinnum í sund síðan byrjað var að gefa ungmennum yngri en 18 ára ókeypis í laugina. Það var nokkuð stór hópur sem hafði náð því marki og meira að segja nokkrir sem höfðu farið 60 sinnum á tímabilinu. Geri aðrir betur!

Síðdegis var athöfn við Kögunarhól þar sem reistir voru 52 krossar til minningar um þá sem látist hafa í umferðarslysum á Suðurlandsvegi milli Selfoss og Reykjavíkur.
Var athöfnin áhrifamikil og táknræn áminning um nauðsyn þess að vegurinn verði tvöfaldaður og umferðaröryggi tryggt á þessari leið. Þau eru skýr skilaboðin: Tvöföldun verður að verða að veruleika nú þegar. Engin önnur leið tryggir öryggi vegfarenda með jafn afgerandi hætti.

Prófkjör Sjálfstæðismanna er á morgun og mikil spenna ríkir hjá frambjóðendum og áhugamönnum um stjórnmál. Ég hef þá trú að Sjálfstæðismenn í Suðurkjördæmi velji sér sterkan og góðan lista sem við getum öll verið stolt af.