Aldís Hafsteinsdóttir

Dagurinn hófst með fundi í stýrihóp Sunnan3. Verkefnið er nú að komast á lokastig en framundan er vinna við uppsetningu á notendagátt á sviði skipulags- og byggingamála. Íbúar sveitarfélaganna Hveragerðis, Ölfuss og Árborgar hafa tekið vel við sér og fjölmargir nýtt sér það að panta skólamáltíðir og vistun í frístundaskólunum rafrænt á netinu.
------------------
Erlendir gestir voru áberandi í dag. Fyrir hádegi komu í heimsókn fulltrúar frá Evrópska knattspyrnusambandinu og KSÍ. Tilgangur heimsóknarinnar var að skoða sparkvöllinn við grunnskólann sem reistur var í átaksverkefni KSÍ og sveitarfélaganna. Leist gestum vel á aðstæður hér í Hveragerði og fannst þeim umgengni um völlinn til fyrirmyndar. Það var líflegt um að litast á skólalóðinni á meðan á heimsókninni stóð en i dag voru malbikaðir allir vellirnir og gangstígarnir á nýju skólalóðinni. Ég bind vonir við að hún verði fullkláruð innan nokkurra vikna.
Hinir erlendu gestir höfðu heilmikinn áhuga á Hveragerðisbæ svo við fórum í stutta ferð um bæinn og skoðuðum meðal annars golfvöllinn og hverasvæðið.
--------------------
Héraðsráð Árnesinga fundaði í fyrsta sinn í dag. Þar bar hæst kæru sem fulltrúar Samfylkingarinnar í Árborg hafa sent Félagsmálaráðuneytinu þar sem þeir krefjast ógildingar fyrsta fundar Héraðsnefndar í sumar. Telja þeir ágalla á fundarboði en það var sent fulltrúum í tölvupósti. Héraðsráð mun að sjálfsögðu senda svar sitt við kærunni til ráðuneytisins og málið fer þar með í hefðbundið ferli.
-------------
Tók á móti 13 ungmennum frá jafnmörgum löndum sem mættu hingað seinnipartinn á vegum Veraldarvina. Þetta er líflegur og skemmtilegur hópur sem strax í fyrramálið mun taka til hendinni í skógræktinni undir Hamrinum. Þau verða hér út vikuna og munu setja svip sinn á bæjarlífið á meðan. Gaman að því.
-------------------------
Fékk heimsókn á skrifstofuna í dag, dönsk hjón, sem ég hef verið í samskiptum við á vegum Kjörís í meira en áratug. Mikið af mínum gömlu birgjum hjá Kjörís halda sambandi þrátt fyrir að ég hafi skipt um starfsvettvang og þykir mér vænt um það.
-------------------------
Hripaði þessa færslu niður í hinum mýmörgu auglýsingahléum í Rockstar Supernova. Fylgdist auðvitað með Magnavöku til loka. Ætli þeir verði ekki margir sem eiga erfitt með að vakna í fyrramálið! ! En mikið rosalega er gaman að fylgjast með Borgfirðningum að austan gera það svona gott í útlandinu. Síðan er lyginni líkast að fylgjast með rembingnum í sófasnillingunum sem fæstir geta fundið nokkuð gott að segja um Magna eða hljómsveitina Á móti sól. Hljómsveit sem spilar lög sem fólki finnast skemmtileg og heldur uppi feikna stuði á böllum hlýtur náttúrulega að vera léleg í augum þeirra sem enginn nennir eða vill hlusta á ! ! !
Ég er allavega bæði stolt og ánægð fyrir hönd Magna og hljómsveitarinnar ÁMS og mun fylgjast með lokaþættinum með athygli og andakt annað kvöld.