Aldís Hafsteinsdóttir

Af veðri og fleiru ...

Hér hefur örlað á sumri undanfarið, já í heila þrjá daga samfellt og nú er ástandið orðið þannig að ef það bara hangir þurrt þá er borðað úti, þrátt fyrir að nálin á hitamælinum skríði ekki uppfyrir 14 gráðurnar.

Dóttirin sem baðar sig í sól og sælu austur á landi sendir skilaboð oft á dag um það hvað veðrið sé nú dásamlegt fyrir austan og að aðalhöfuverkur hvers dags sé hvort fara eigi í bikiní toppinn eða hlýrabolinn! ! ! Fatnaður sem finnst ekki í fataskápum náhvítra, gegndrepa og vindbarðra Sunnlendinga.

En úr því sem komið er þá bind ég í sjálfselsku minni vonir við að veðrið haldist gott fyrir austan því þangað verður stefnan sett í nokkra daga síðar í sumar.
---------------
Í liðinni viku fórum við Lárus austur á Hvolsvöll að hitta góðan hóp fólks. Þar sem við höfðum rúman tíma áður en sú veisla byrjaði ákváðum við að kíkja í Eldstó Kaffi, en "Út og suður" fjallaði um hjónin sem reka staðinn nú nýlega. Þetta er mjög skemmtilegt og heimilislegt kaffihús og það er enginn svikinn af að líta þar inn. Húsfreyjan mjög gestrisin og ræddum við um heima og geima en þó mest um hjólaferðir. Við vorum sammála um það að fáir staðir henta betur til hjólreiða en Suðurlandið og ræddum við ýmsar hugmyndir varðandi uppbyggingu hjólastíga sem gaman gæti verið að hrinda í framkvæmd. Til þess þurfa sveitarfélögin á svæðinu að taka höndum saman en þannig gerast líka góðu hlutirnir, með samstilltu átaki.

Á laugardaginn vorum við enn upptendruð eftir hjólaumræðuna og þrátt fyrir ömurlegt veður, var örverpinu og vini hans troðið í pollagalla og stígvél, og haldið var í hjólaferð inní Dal. Rigningin var eins og hún getur best orðið. En nú átti að hjóla yfir fínu brúna innst í Dalnum og hjóla svo meðfram Reykjafjallinu heim. En nei vatnavextir í þessari smásprænu eru slíkir að brúin var hrunin eina ferðina enn og ekki annað að gera en að hjóla yfir beljandi "stór fljótið". Þetta var auðvitað óðs manns æði og allir enduðu gegnblautir eftir volkið. Ég þó sýnu verst, enda sú eina sem endaði í ánni með nokkrum tilþrifum. En úr því sem komið var þá skipti engu þó að ringdi því allir voru rennandi hvort sem var, hjólað var því yfir alla læki og polla sem urðu á veginum og fyrir yngstu kynslóðina er það eitt og sér frábært. En mikið voru allir fegnir að komast í hús að loknu þessu rallíi.
--------------------------------
Í gær, mánudag, gekk ég frá samningi um kaup Hveragerðisbæjar á Breiðumörk 24, húsi Hverakaups. Þarna er um að ræða 2700 m2 lóð við aðalgötu bæjarins en þarna hefur verið rekin verslun í 400 m2 húsi í yfir 50 ár. Í húsinu var Kaupfélag Árnesinga lengst af með verslun en fyrir nokkrum árum keypti Vigfús Þormar Guðmundsson eignina og flutti verslun sína Hverakaup yfir götuna og í þetta húsnæði. Nú er svo komið að ekki er lengur grundvöllur fyrir rekstri verslunarinnar og mun hann hætta rekstri í Hveragerði þann 1. september. Það verða þónokkur viðbrigði fyrir Hvergerðinga að hafa ekki lengur “Kaupmanninn á horninu” en án vafa munu aðrir verslunareigendur í Hveragerði sjá sér leik á borði og auka þjónustu við Hvergerðinga í kjölfarið.
------------------
Sigurbjörg systir sem býr á Eskifirði á afmæli í dag --- hamingjuóskir að sunnan ! ! !