Aldís Hafsteinsdóttir

Fjárhagsáætlun og tónleikar

Fyrri umræða um fjárhagsáætlun ársins 2006 fór fram á bæjarstjórnarfundi í dag.
Samkvæmt áætluninni mun bærinn skila jákvæðri niðurstöðu frá rekstri uppá rúmar 55 milljónir. Handbært fé í árslok samkvæmt sjóðsstreymisyfirliti mun nema rétt tæpum 150 milljónum króna.

Það er mikil bjartsýni ríkjandi í áætlunini og óskandi að væntingar meirihlutans varðandi afkomu bæjarsjóðs muni ganga eftir. En ljóst er aftur á móti að niðurstaða ársins 2004 gefur engan veginn tilefni til þeirrar bjartsýni sem hér er lagt upp með. Síðan þá hefur reyndar Hitaveita okkar Hvergerðinga verið seld og auðvitað munar um þær krónur sem þá komu inní reksturinn. Á árinu 2006 mun Orkuveita Reykjavíkur greiða lokagreiðsluna fyrir Hitaveituna eða 67 milljónir króna.

Það er nokkuð ljóst að bærinnn hefur hagnast umtalsvert á undanförnum árum vegna hækkandi fasteignamats í bæjarfélaginu. Það er einnig nokkuð ljóst að álögur á bæjarbúa munu hækka gríðarlega á komandi ári verði fjárhagsáætlunin samþykkt í því formi sem fyrir liggur. Þróun fasteignaverðs hér í Hveragerði hefur verið með þeim hætti að fasteignamat mun að öllum líkindum hækka um tugi prósenta sem aftur verður til þess að fasteignaskatturinn hækkar um það sama. Boðuð lækkun álagningarprósentu úr 0,38 í 0,37 mun hafa óveruleg áhrif í þessu samhengi.

Í ljósi stöðu bæjarfélagsins lögðum við Sjálfstæðismenn fram eftirfarandi tillögur og væntum þess að meirihlutinn taki þær til skoðunar fyrir seinni umræðu sem fram á að fara í næstu viku:

-Álagningarprósenta fasteignaskatts á íbúðarhúsnæði verði endurskoðuð og að jafnframt verði komið til móts við eldri borgara og öryrkja og afsláttur þeirra af fasteignaskatti taki tillit til hinnar miklu hækkunar fasteignamats sem orðin er í bæjarfélaginu.

-Árið 2006 verði framkvæmdir hafnar við gatnagerð í Þórsmörk, Klettahlíð og Bröttuhlíð og þannig lokið því þarfa verkefni að allar götur Hveragerðisbæjar séu klæddar bundnu slitlagi. Það er einfaldlega ekki lengur bjóðandi að íbúar í þéttbýli sem telur rúmlega 2000 manns búi við malargötur.

-Fjármunum verði veitt til löngu tímabærs utanhússviðhalds á íþróttahúsi bæjarins. Því hefur ekki verið sinnt að neinu marki í 20 ár ef frá er talin endurnýjun á þaki sem fram fór á síðasta kjörtímabili.

-við ítrekuðum einnig fyrri tillögur okkar um að umhverfismálum bæjarfélagsins verði á ný skipað í öndvegi og að til bæjarins verði ráðinn garðyrkjumaður sem sinni þessum málaflokki.

Bæjarstjórn samþykkti samhljóða tillögu Herdísar Þórðardóttur um að fram færi könnun á því hvort til staðar væri kynbundinn launamunur hjá Hveragerðisbæ. Spannst um málið heilmikil umræða og það meira að segja löngu eftir að fundi var slitið! Greinilegt að málefnið brennur á fólki enda allsendis óþolandi að konur og karlar skuli ekki fá sömu laun fyrir sömu vinnu árið 2005.

Bæjarstjórnarfundurinn var frekar stuttur í þetta skiptið þrátt fyrir fjárhagsáætlunina. Helgaðist það ekki síst af þeirri staðreynd að nokkrir bæjarfulltrúar höfðu hug á að fara á tónleika Hollvinasamtaka HNLFÍ sem haldnir voru í kvöld í Hveragerðiskirkju.
Eiga samtökin allt hrós skilið fyrir skemmtilega tónleika. Karlakór Selfoss, Eyjólfur Kristjánsson, Magnús Þór Sigmundsson og hópur bráðefnilegra tónlistarnemenda úr bæjarfélaginu skemmtu gestum og var vel fagnað. Hápunktur tónleikanna var þó þegar Magnús Þór kom óvænt upp og söng lagið Álfar með Eyjólfi Kristjánssyni. Setti það atriði skemmtilegan punkt aftan við frábæra skemmtun.