Aldís Hafsteinsdóttir

Sunnulækjarskóli á Selfossi



Fór í dag ásamt Ingu Lóu að skoða nýja grunnskólann á Selfossi, Sunnulækjarskóla. Í þessum nýja skóla verður unnið eftir harla nýstárlegum kennsluaðferðum eða einstaklingsmiðaðri kennslu. Þarna eru hefðbundnar bekkjarstofur ekki til staðar heldur munu bekkirnir vera í opnum sameiginlegum rýmum en engir veggir skilja að bekkina. Við fyrstu sýn virkar þetta svolítið yfirþyrmandi þar sem manns hefðbundni skilningur og reynsla af skólastarfi segir manni að bekkur eigi að vera í sinni stofu með sínum kennara. En þetta fyrirkomulag býður uppá allt aðra hluti og aðrar kennsluaðferðir og verður gaman að fylgjast með hvernig til tekst.
Kennsla með þessum hætti gerir heilmiklar kröfur bæði til kennara og nemenda. Kennari þarf að haga sinni kennslu þannig að hún samræmist öðrum bekkjum sem í rýminu eru og það má ekki gerast að kennari missi nemendurnar í óþekkt og ólæti! ! !
Með sama hætti má segja að krakkarnir þurfa að temja sér aðra og betri hegðun þar sem öll frávik verða ansi áberandi. En auðvitað byggir þetta á því að börnin venjast þessum skólaháttum frá fyrstu tíð. Má til að segja það að kennsla í Grunnskólanum á Kópaskeri hefur verið með þessum hætti ansi lengi og húsið byggt með svona kennsluhætti í huga fyrir þónokkuð löngu síðan. Samkvæmt Sigrúnu mágkonu var fín reynsla af þessu þar.

En Sunnulækjarskóli á Selfossi er glæsileg bygging og Árborgarbúar mega vera stoltir af þessari nýjustu viðbót við skólastofnanir bæjarins.