Aldís Hafsteinsdóttir

Sameinumst - eða ekki !

Sat fund í gær sem boðað var til af nefnd sem vinna á að eflingu sveitarstjórnarstigsins. Í stuttu máli var lítið á þessum fundi að græða! Rætt fram og til baka um það sama og við höfum þegar rætt um og lesið margoft á síðustu árum.
Það vantaði alveg eitthvað bitastætt í umræðuna. Hvað ætlar þessi nefnd að gera? Hvað leggur hún upp með? Síðan vantar alveg í þessa vinnu að mínu mati ákveðinn grundvallarþátt sem eru forsendurnar. Hef á tilfinningunni að nú eigi að sameina sveitarfélög burtséð frá öllum rökum og þeim tilfinningum sem fólk hefur. Mér finnst vanta að sveitarstjórnarmenn, eða einhverjir aðrir, setjist niður og fari efnislega yfir kosti og galla sameiningar og gleymi ekki þeim kosti heldur að hafa áfram óbreytt ástand. Eftir hverju erum við sveitarstjórnarmenn að bíða? Eigum við að bíða eftir því að þessi nefnd skili fullbúnum tillögum eða ætlum við að leggja línurnar sjálf?

Svo ég horfi nú ekki lengra en að túnfætinum verð ég að segja að ég á erfitt með að sjá hverju við Hvergerðingar verðum til dæmis bættari við sameiningu. Við búum hér í um 2000 manna ört vaxandi bæjarfélagi þar sem þjónusta er á flestum sviðum eins og best verður á kosið. Sveitarfélagið þekur svæði sem er ekki miklu stærra en bújörð austur í sveitum svo ekki eru landfræðilegar fjarlægðir að há okkur varðandi þjónustu við íbúana.
Hvað viljum við fleira? Í umræðunni þurfum við að skilgreina hverjar eru þarfir okkar og langanir og hvernig getum við best náð þeim markmiðum sem við setjum Hveragerðisbæ.

Mikið er talað um sameiningu Ölfuss og Hveragerðis og sýnist þar sitt hverjum. Margir virðast ekki geta litið framhjá þeirri staðreynd að við erum eyríki inní Ölfusinu. Ég segi aftur á móti, og hvað með það??? Er ekki Sviss eyríki í Evrópu? Enginn talar um þá lífsnauðsyn að vegna landfræðilegrar legu beri þeim að sameinast nágrönnum sínum.

Það er velþekkt staðreynd að sameining sveitarfélaga með tvo sterka byggðakjarna er afar erfið. Sameining þar sem aftur á móti er óumdeilanlegur miðpunktur er miklu auðveldari. Þess vegna hef ég í umræðunni sagt að ef við, að afloknum vönduðum undirbúningi, komumst að þeirri niðurstöðu að hag Hvergerðinga er betur borgið í stærra sveitarfélagi þá ber okkur skylda til að horfa á hlutina í stærra samhengi og líta þá til þess að Árnessýsla verði gerð að einu sveitarfélagi. Sveitarfélagið sem þannig yrði til yrði eitt það stærsta á landinu og í mjög hröðum vexti. Slík sameining gæti orðið spennandi og til hagsbóta fyrir alla Árnesinga.

Til þess að ásættanleg niðurstaða náist þarf að fara fram miklu meiri og opnari umræða um þessi mál. Umræða þar sem ALLIR þora að setja fram sína skoðun án hættu á því að verða stimplaðir forpokaðir, gamaldags eiginhagsmunaseggir eins og örlítið hefur borið á þegar sitt sýnist hverjum í umræðunni.