Aldís Hafsteinsdóttir

Í síðustu viku var meðal annars unnið að stofnun nýrrar skólaþjónustu í Árnesþingi utan Árborgar á góðum fundi oddvita á Borg í Grímsnesi. Það var mikið gæfuspor þegar við fengum Gerði G. Óskarsdóttur fyrrverandi fræðslustjóra Reykjavíkur til að vinna með okkur að skipulaginu og stofnun þjónustunnar. Hún er mikill reynslubolti sem kann fagið betur en flestir aðrir. Næstu skref í þessu máli er að afla samþykkis allra sveitarstjórnanna á svæðinu og auglýsa síðan eftir starfsmönnum. Það þarf að gerast fljótlega í nóvember.

Hitti Finnboga Alfreðsson, atvinnuráðgjafa hjá SASS og fórum við yfir ýmsa þætti er lúta að atvinnumálum í Hveragerði en nú vinna ráðgjafar SASS að mótum atvinnustefnu í fjórum sveitarfélögum á svæðinu. Við urðum fyrir valinu og fer verkefnið vel af stað. Í lok fundar fórum við í langa bílferð þar sem ég sýndi honum Hveragerði og helstu fyrirtækin hér. Já! það er hægt að fara í langan bíltúr í Hveragerði, þetta er ekki svo lítið sveitarfélag :-)

Undanfarið hef ég átt í nokkrum samskiptum við Íbúðalánasjóð. Nú er staðan þannig hér í Hveragerði að ILS á hér 45 íbúðir, 21 er auð, 19 í leigu en 5 eru óíbúðarhæfar. Þessi eignastaða er ekkert frábrugðin því sem er í öðrum sveitarfélögum hér á Suðurlandi en sjóðurinn á hér 361 íbúð. Það er aftur á móti uggvænlegt að sjóðurinn skuli þannig vera orðinn einn helsti eigandi íbúðahúsnæðis á Suðurlandi og á hans vegum standa hér tugir ef ekki hundruðir af tómum íbúðum. Úr því þarf að bæta strax.

Tónleikar kennara Tónlistarskóla Árnessýslu á föstudagskvöldið voru hreint frábærir. Fjölbreytt og skemmtileg efnisskrá en það kom á óvart hversu fjölhæfir kennarar skólans eru. Vissi það reyndar fyrir en það kom mér samt á óvart :-)