Aldís Hafsteinsdóttir

Fór í vinnuna þrátt fyrir pest sem enn herjar á mig og fullkomlega eyðilagði annars góða helgi. Missti af jólahlaðborði, 50 ára afmæli Helgu Bjarnadóttur, listamannaspjalli í Listasafninu og aðventutónleikum Söngsveitarinnar svo fátt eitt sé talið :-(

En dagurinn í dag varð bæði annasamur og langur en ég skilaði mér ekki heim fyrr en rúmlega 9 í kvöld. Þá var ég líka búin að kíkja á prjónakaffið í bókasafninu þar sem Gunna vinkona var að opna sýningu á vefnaði og krosssaumi. Hún er náttúrulega snillingur í öllu sem hún tekur sér fyrir hendur. Þetta var hin notalegasta stund, fullt af konum á öllum aldri og allar að gera svo fallega og fína hluti. Ég dáðist að öllum hinum og skoðaði dýrðina í blöðunum en flaug ekki til hugar að mæta með metnaðarlausa trefilinn sem er á prjónunum hér á bænum ;-)

Á prjónakaffið mætti ég beint af meirihlutafundi þar sem farið var yfir fundarboð bæjarstjórnar og ýmis önnur mál sem ofarlega eru á baugi núna.

Í vinnunni í dag fundaði ég með leikskólastjórum vegna nýrra reglna um innritun og innheimtu gjalda en þær verða lagðar fyrir bæjarstjórnarfund til samþykktar.

Elfa og Birgir Þórðarson frá Heilbrigðiseftirliti Suðurlands eru að skoða nýja möguleika á að losa sveitarfélagið við "lífmassa" sem er afurð skolphreinsistöðvarinnar. Í dag funduðu þau ásamt fulltrúum tveggja annarra sveitarfélaga í sýslunni sem einnig eru að skoða svipaða hluti. Ég sat lungann úr fundinum enda finnst mér málið áhugavert og þær lausnir sem eru til skoðunar geta sparað sveitarfélaginu mikla fjármuni.

Við Jóhanna hittumst einnig og fórum yfir málefni er tengjast íþróttafélaginu hér í bæ, en Hamar er afar öflugt félag sem borið er uppi af einstöku neti sjálfboðaliða. Þeirra starf er aldrei of oft þakkað. Það er ekki sjálfgefið að sveitarfélag af okkar stærð eigi lið í toppbaráttu eins og nú er að gerast í körfunni hjá stelpunum og strákarnir eitt af þeim liðum sem hvað mest hafa komið á óvart í vetur. Badminton krakkarnir raka til sín verðlaunum, fimleikarnir í miklum blóma og áfram mætti telja. Við viljum svo gjarnan bæta aðstöðuna sem í boði er og því leitum við allra leiða til að slíkt megi verða mögulegt án þess að það verði sveitarfélaginu ofviða fjárhagslega. Því höfum við skoðað möguleikana á loftbornu íþróttahúsi sem risið hafa eins og gorkúlur út um allan heim í tugi ára. Þrisvar til fjórum sinnum ódýrari í byggingu heldur en þau hús sem við hingað til höfum þekkt, en gæðin gríðarlega góð. Við heyrum auðvitað gagnrýnisraddir, talað er um vindbelg, blöðruna, stórslys, húsið fjúki niður í sveit og annað í þessum dúr. Þessar raddir koma undantekningalaust frá aðilum sem ekki hafa kynnt sér málið. Því hvet ég alla sem áhuga hafa á uppbyggingu íþróttamannvirkja til að mæta á íbúafundinn í grunnskólanum næstkomandi fimmtudag og kynna sér málið. Fjöldi flottra frummælenda mun kynna loftborin íþróttahús svo viðstaddir geti kynnt sér málið af eigin raun.

Skoðið líka síðuna sem ég setti upp um loftborin íþróttahús, tengillinn er hér ofarlega til vinstri......