Aldís Hafsteinsdóttir

Alltaf gaman að eiga afmæli! Takk fyrir kveðjuna Laufey!

Ég er reyndar ekki betri en Jósefína hin danska og er mjög á móti þessum afmælisdegi. Maður nennir aldrei að gera neitt og hefur á tilfinningunni að allir hafi eitthvað annað þarfara að gera en að eyða tímanum í afmælisveislur þegar jólabrjálæðið stendur sem hæst.

Síðan heldur fólk áfram að gera börnum sínum þennan óskunda, haldið þið ekki að Guðbjörg litla frænka mín eigi sama afmælisdag og ég.
Greyið litla mun verða í veseni með veisluna "for the rest of her life" !

En til að vega upp á móti þessum degi hef ég nú samt gripið til þess ráðs að hafa ALLTAF afmælisveislu alveg sama hvað á dynur. Þar sem nú var "stór" afmæli þá mættu hingað nokkrir til að fagna áður en aldurinn bugar mann endanlega :-)
Stór kokkurinn var ekki á svæðinu þannig að veitingunum var reddað af húsmóðurinni, allir enn við bestu heilsu ... að því að best er vitað !
Mér áskotnaðist forláta reiðhjól frá systkinum mínum og fylgifiskum þeirra, fylgdi með að héðan í frá væri bannað að ferðast um á eðalvagninum innanbæjar, nú á að hjóla allt. Takk elskurnar!

Eins gott að mamma sá við ykkur og gaf mér forláta hægindastól þar sem ég get látið harðsperrurnar líða úr mér og drukkið te frá Himalaja úr Aladdín tekatlinum frá Grundarsystrum.

OK OK OK ég tek þetta til baka --- það er frábært að eiga afmæli --- jafnvel líka svona rétt fyrir jól

Edith Piaf í Þjóðleikhúsinu !



Vorum að koma af frábærri sýningu Þjóðleikhússins á Edith Piaf. Það er ekki skrýtið þó að Brynhildur Guðjónsdóttir sé ausin lofi fyrir frammistöðu sína í þessari sýningu. Hún verður að Edit Piaf ! ! ! Ekki flóknara en það. Það er ekki oft sem ég hef upplifað það að sýningagestir í Þjóðleikhúsinu láti í ljós ánægju sína með stappi og hrópi þegar sýningu lýkur og endi svo á standandi lófataki. Heyrði líka út undan mér að sumir voru að sjá sýninguna í annað og jafnvel í þriðja sinn.
Væri svo sem alveg til í það líka.
Þegar við komum heim gróf ég upp gamla vinyl plötu með original Piaf og það var frábært að heyra franska Spörfuglinn syngja með tilheyrandi braki og brestum eins og fylgir gömlu plötunum. Ekki inní myndinni að ég láti gamla plötuspilarann. Hann er með sál og þessar gömlu plötur líka.
---------------------------
Nú erum við búin að sjá þrjá söngleiki á stuttum tíma. Edith Piaf í kvöld, Vesalingana "Les miserables" í London um daginn og Chicago í Borgarleikhúsinu í byrjun nóvember. Hver með sínu sniði og allir skemmtilegir. Það er auðvitað upplifun sem maður á ekki að missa af að sjá söngleik í London. Umgjörðin er svo stórfengleg og sýningarnar svo fjölmennar og miklar. Verð nú samt að segja að Valjean var mun glæsilegri í meðförum Jóhanns Sigurðarssonar hér um árið heldur en leikarans sem fór með hlutverkið í London.