Aldís Hafsteinsdóttir

Það er fátt sem setur líf manns eins úr skorðum og veikindi! Þrátt fyrir árlega bólusetningu tókst mér að næla í hina ágætustu flensu sem eftir heila viku með hita endaði með lungnabólgu og tilheyrandi, enn ekki orðin góð, en verður að duga !

Helgin hin rólegasta í góðra vina og fjölskyldu hópi. Yndislegt! Ríkissjónvarpið á síðan hrós skilið fyrir dagskrána í kvöld, sunnudag. Ekki oft sem maður límist fyrir framan kassann en í kvöld gerðist það! Allir þættirnir góðir! Næstu sunnudagskvöld eru hér með frátekin fyrir "Borgen", sá þáttur lofar góðu!

Var í vinnunni á fimmtudag og föstudag og enn og aftur setti veðrið allt úr skorðum, þeir sem áttu fundi fyrir austan komust ekki og ég komst ekki á fund stjórnar Sambands íslenskra sveitarfélaga á föstudag. Sat þó fundinn sem símafund sem er ágætt þegar svona stendur á, kemur þó ekki í stað þess að mæta, verð ég að játa.

Hafsteinn og Kristján Valdimarssynir urðu í gær Norðurlandameistarar félagsliða í blaki með liði sínum Marienlyst í Odense í Danmörku. Það er skammt stórra högga á milli því um síðustu helgi urðu þeir bikarmeistarar Danmerkur! Það er virkilega gaman að fylgjast með þeim og ekki spillir gott gengi liðsins fyrir. Til hamingju með árangurinn, elsku frændur!

Undanfarið hefur lítið verð bloggað en nú er stefnan tekin á að bæta úr því hið snarasta ...

Fundur vegna Hamarshallarinnar eftir hádegi í dag. Þar eru endalaust lausir endar til að hnýta. Stjórn Fasteignafélagsins hittist á fimmtudag en þá verður farið yfir niðurstöðu útboðsins og gengið frá samningi við verktaka.

Síðdegis hittum við Jóhanna Ýr, framkvæmdastjóra og fjölmiðlafulltrúa Orf líftækni. Fundurinn var að Reykjum í tilraunahúsinu sem hýsir erfðabreyttar byggplöntur. Þetta var góður fundur þar sem farið var ítarlega yfir ræktunina og þau álitaefni sem uppi eru. Eðlilega eru forsvarsmenn Orf vissir um öryggi og gildi þeirra aðferða sem þarna er notuð. Enda væri annað harla óeðlilegt verandi í þessum bransa. Ég hefði gjarnan viljað að fleiri hefðu mætt úr bæjarstjórninni á þennan fund en því miður voru ýmsar ástæður fyrir því að eingöngu ég og Jóhanna höfðum tök á því. Erum sérfræðingar í erfðabreyttum lífverum í staðinn :-)

Meirihlutafundur í kvöld sem varð lengri en ég átti von á, en frekar fámennt var á fundinum. Það er mikið um að vera á mörgum vígstöðvum.

Reykjavíkur ferð í dag þar sem endað var á Sherlock Holmes myndinni nýju sem stóð alfarið undir væntinum allra! Flott mynd og "slow motion" atriðin ótrúlega flott :-) Alltaf þegar ég sé Jude Law í myndum þá get ég ekki annað en rifjað upp þegar ókunnugur útlendingur kom úti Kjörís fyrir nokkrum árum með börnin sín. Hafði haft af því spurnir að hér væri svona local ísgerð sem hægt væri að fá að skoða. En nei, Fríða tók á móti þessu útlending af miklum myndugleik og tjáði honum að verksmiðjan væri ekki til sýnis ! Við það fór útlendingurinn sneyptur í burtu, eftir á að hyggja reyndist þetta hafa verið Jude Law sem fyrst hafði heimsótt Garðyrkjustöð Ingibjargar Sigmunds. og frétti þar af Kjörís. Það er mikið búið að stríða Fríðu á því að hafa ekki þekkt hjartaknúsarann breska :-)

Þegar heim var komð gaf gamla túpusjónvarpið endanlega upp öndina. Það var frekar sorglegt þar sem við ætluðum að verða svona eins og síðasti móhíkaninn varðandi sjónvarpseignina !

Góður dagur á skrifstofunni. Hitti Ástu Camillu sem sá um Blóm í bæ í fyrra og fórum við yfir sýninguna sem þá var haldin og þær hugmyndir sem hún hefur um það sem betur mætti fara i framhaldinu. Góður fundur! Í kjölfar hans heyrði ég í blómaskreytum sem væntanlega halda aðalfund sinn fljótlega og fjalla þá betur um Blóm í bæ. Framlag blómaskreyta er mjög mikilvægt fyrir sýninguna en þau hafa sýnt ótrúlega hugmyndaauðgi í skreytingum sem vakið hafa athygli á landsvísu.

Heyrði í fulltrúa Umhverfisstofnunar og Umhverfisráðuneyti vegna ýmissa mála sem brunnið hafa á Hvergerðingum. Bæjarstjórn frestaði ákvörðun í máli Orf líftækni í gær þar sem okkur tókst ekki að hitta þá í vikunni vegna veðurs. Ljóst er að við höfum nægan tíma þar sem kærufrestur líður ekki fyrr en þann 30. jan. Ef bæjarstjórn skyldi vilja fara þá leið.

Hitti aðila sem eiga land hér í Hveragerði og vilja gjarnan losna við það. Það eru ekki mörg ár síðan að hektararnir hér voru seldir á hundruðir milljóna sbr. Tívolí lóðina. Nú er verð á landi með allt öðrum hætti og engan veginn hægt að bera þetta saman. Verð á landi fer fyrst og fremst eftir eftirspurninni og núna standa ekki verktakar í röðum og bíða eftir byggingalandi. Áður en það getur gerst þarf annað af tvennu að gerast, fasteignaverðið að fara upp eða byggingakostnaður niður! Hvorugt er líklegt í augnablikinu.

Vann í lánamálum vegna kaupanna á mjúkhýsinu og nú held ég að sjái fyrir endann á því. Það væri nú meiri munurinn ef við Íslendingar og bankastofnanir okkar nytum trausts eins og áður var erlendis!

Fyrir hádegi skruppum við Guðmundur Baldursson til Reykjavíkur til að hitta Lúðvík Geirsson og Guðna Geir í Innanríkisráðuneytinu en þeir sjá um yfirfærslu málefna fatlaðra í ráðuneytinu. Við ræddum húsnæðið að Birkimörk en þar búa nú 5 einstaklingar með fötlun. Bænum býðs annað hvort að kaupa húsið eða að leigja það. Okkur sýnist enginn vafi leika á því að hagkvæmara er að bærinn eignist húsið og handsöluðum við kaupverð sem allir geta vel við unað. Auðvitað með fyrirvara um samþykki bæjarstjórnar. Húsið þarfnast umfangsmikils viðhalds þrátt fyrir að vera nýlegt svo tekið er tillit til þess í kaupverðinu.

Hér fyrir austan beið okkar opnun tilboða í undirstöður og lagnir Hamarshallarinnar. Þónokkuð margir mættu til að vera viðstaddir opnunina en 19 skiluðu inn tilboðum. Lægsta tilboð átti Trésmiðja Sæmundar Gíslasonar, Þorlákshöfn, 103 mkr eða um 83,4% af kostnaðaráætlun. Hann er okkur að góðu kunnur enda bjó hann hér um árabil og byggði meðal annars fráveitumannvirkið.

Bjarni Bjarnason, forstjóri Orkuveitu Reykjavíkur, mætti hingað með fríðu föruneyti kl. 16 til að hitta bæjarfulltrúa. Var farið yfir mál tengd grunnvatni, manngerðu jarðskjálftunum sem margir vilja nú kalla örvunarskjálfta og brennisteinsvetnismengun. Var þetta hinn besti fundur og umræðurnar hreinskiptnar og góðar. Það er óhætt að hrósa Bjarna fyrir þann góða vilja sem hann sýnir til betri samskipta. Það er engum akkur í því að hér séu mál alltaf stál í stál og engin spurning að fundir sem þessi eru af hinu góða. Um það var hópurinn sammála. Á myndinni má sjá fulltrúa Orkuveitu Reykjavíkur ásamt bæjarfulltrúum.

Strax að loknu fundinum með OR tók við bæjarstjórnarfundur en honum lauk ekki fyrr en undir kl. 20. Líflegur og skemmtilegur fundur og eins og oft áður bera bókanir ekki vitni um þann góða anda sem ríkti á fundinum.


Þar sem fundir nú síðdegis drógust á langinn missti ég af tónleikum ungra einleikara með Sinfóníunni sem hófust í Eldborg kl. 19:30. Grunaði reyndar að þetta yrði reyndin svo það kom mér svo sem ekki á óvart. Leiðinlegt að tónleikarnir skyldu lenda á bæjarstjórnarfundi því það hefði verið virkilega gaman að sjá og heyra Chrissie Thelmu Guðmundsdóttur spila með hljómsveitinni. En ég efast ekki um að ég fæ til þess fleiri tækifæri því hún Chrissie er ein af okkar fremstu tónlistarmönnum. Við Hvergerðingar höfum fylgst með henni um árabil og erum afar stolt af því hversu vel henni gengur.

Drykkurinn Aada frá My Secret er framleiddur hér í Hveragerði en jarðgufan knýr áfram suðupotta fyrirtækisins og tryggir þannig góða og vandaða framleiðslu. Ólafur Sóliman eigandi My Secret kemur stundum til skrafs og ráðagerða og það gerði hann í morgun. Salan á vörunni hefur gengið vonum framar enda er þetta afskaplega góð vara með mjög ákveðinn og meðvitaðann markhóp.

Skrapp síðan niður á Heilsustofnun NLFÍ og hitti þar Inga Þór markaðsstjóra og Ólaf forstjóra. Fórum yfir málefni er varða íbúðir ÍAV á Heilsustofnun en þar geta þeir sem orðnir eru 50 ára eða eldri keypt sér glæsilegar íbúðir og notið um leið þeirrar þjónustu sem HNLFÍ býður uppá. Bráðsniðugt og vinsælt búsetuform.

Átti langt samtal við Guðmund Tryggva framkvæmdastjóra Sorpstöðvar Suðurlands um hinn svokallaða refsiskatt sem íbúar hér í Hveragerði þurfa að greiða ásamt íbúum i Flóahreppi og Skeiða- og Gnúpverjahreppi. Skatturinn er tilkominn vegna þess að við hér flokkum meira en aðrir og skilum því minna til urðunar. Við Guðmundur Tryggvi erum búin að ræða þetta afskaplega oft og verðum seint sammála.

Annars voru málefni Strætós, mjúkhýsisins, Hellisheiðarvirkjunar, starfsmannamál, álagning fasteignagjalda og undirbúningur fyrir bæjarstjórn á morgun ásamt mörgu mörgu fleiru á dagskrá dagsins.

Í kvöld hittust síðan foreldrar unglinganna í 10. flokki í körfu en nú er undirbúningur fyrir ferð krakkanna í æfingabúðir í Bandaríkunum næsta sumar á lokastigi. Mikil fjáröflun framundan þannig að ef lesendur sjá fram á að það vanti klósettpappír, kartöflur, rækjur eða lakkrís þá endilega hafið samband.

Vann í málum tengdum Hamarshöllinni í dag en nú þarf að greiða fyrir húsið í samræmi við ákvæði samningsinn um kaupin á Hamarshöllinni. Þetta er nokkuð sérstakt þar sem við erum að tryggja greiðslu núna án þess þó að aurinn fari til seljanda fyrr en húsið er komið hingað. Átti nokkur viðtöl við fólk í dag vegna starfsmannamála og velferðarmála. Enginn kom á fundi dagsins þar sem veðrið bauð ekki uppá útivist. Við ætluðum að hittast hér í dag bæjarstjórar í Ölfusi, Árborg og Hveragerði en breyttum fundinum snarlega í símafund. Það var virkilega góð ákvörðun. Ræddum velferðarmál sem við þurfum að fá lendingu í. Sendi út fundarboð bæjarstjórnar og sem betur fer náði ég Alberti með mér sem klifraði yfir ruðninga og klofaði skafla með fundarboðið í húsin. Rafmagnið hefur verið með leiðindi í kvöld og blikkað stöðugt, þó haldist inni. Rafmagn fór aftur á móti af Hellisheiðarvirkjun sem er snúið mál, enda mikið verk að ná virkjuninni aftur í gang. Heyrði í þeim Orkuveitumönnum vegna þessa og verð aftur í sambandi við þá á morgun. Í dag var ákveðið að íbúar gætu mætt á gámasvæðið með fötur og náð sér í sand og/eða salt til að nýta til hálkuvarna. Þetta virðist mælast vel fyrir allavega hefur þessi tilkynning fengið mikinn hljómgrunn á Facebook. Laufey og Elli eru í suður Thailandi núna komin í þjóðgarðinn Khao Sok. Flottur staður þar sem stærsta blóm heims finnst í frumskóginum. Bað um afleggjara/fræ fyrir Blóm í bæ :-)