10. apríl 2014
Langur og annasamur dagur að kveldi kominn :-)
Endaði daginn ásamt Róberti Hlöðverssyni með Lóu Pind Aldísardóttur í löngu viðtali um sveitarstjórnarmál í Hveragerði, um það sem hæst ber og við teljum að verði mál málanna í kosningunum í vor. Við áttum í nokkrum erfiðleikum með að finna einhver ágreiningsefni enda hefur samkomulagið í bæjarstjórn verið til mikillar fyrirmyndar og ég fullyrði að það hafi smitað út í bæjarfélagið sem aftur hafi grætt að skynsamlegum og góðum málamiðlunum sem bæjarfulltrúar hafa náð í svo til öllum málum. Hér er það ekki flokkspólitík sem ræður ríkjum heldur miklu frekar heilbrigður skoðanamunur á milli einstaklinga eins og alltaf er eðlilegt í mannlegum samskiptum. Hafandi upplifað alla flóruna af samskiptum milli bæjarfulltrúa þá fullyrði ég að fyrir bæjarbúa er árangursríkast ef bæjarfulltrúar geta átt góð og uppbyggileg samskipti sín á milli. Þannig farnast bæjarfélaginu best.
Annars var ársreikingur bæjarins fyrir 2013 lagður fyrir til fyrri umræðu í dag. Hér er fjárhagur í traustum skorðum og rekstur í samræmi við áætlanir. Skuldahlutfallið nemur um 132% sem er þónokkuð undir hámarkinu sem er 150% af tekjum. Í umfjöllun endurskoðanda kom meðal annars fram eftirfarandi:
Veltufé frá rekstri A og B hluta nemur um 198 mkr eða 11,14 % af
heildartekjum. Handbært fé frá rekstri
var 233,4 mkr. en áætlun gerði ráð fyrir 217,3 mkr. Þessi stærð er mjög
mikilvæg þar sem hún sýnir þá peningamyndun sem varð hjá sveitarfélaginu á
árinu. Eðlilegt er að gera ráð fyrir að þessi stærð sé hærri en nettó
greiðslubyrði langtímaliða til þess að sveitarfélagið þurfi ekki að fjármagna rekstur
eða endurgreiðslu lána með nýju lánsfé eða sölu eigna.
Ef rekstur sveitarfélagsins á árinu 2014 verður svipaður og á árinu 2013 þá
mun handbært fé frá rekstri verða nægjanlegt til þess að greiða fyrir áætlaðar
afborganir lána og afgangur verður til fjárfestinga. Fjárfestingahreyfingar á árinu 2013 námu 66,9
mkr, en í áætlun var gert ráð fyrir 67,5 mkr.
Ég held að við getum öll verið stolt af góðri rekstrarniðurstöðu bæjarfélagsins okkar.
Ein af betri ákvörðunum dagsins var þegar bæjarstjórn samþykkti að kaupa hreiðurrólur á báða leikskólana og ný leiktæki á lóð Skólasels og á Hólaróló. Það getum við gert vegna óvæntra tekna vegna gatnagerðargjalda.
Maður á aldrei að fara að rugla í stillingunm á síðunni - það er bara vesen eins og sést :-)
Maður á aldrei að fara að rugla í stillingunm á síðunni - það er bara vesen eins og sést :-)
Comments:
Skrifa ummæli
